اخر موضة الملايرية لمغاربة: البيزنس فالعشر الاواخر…كيخسرو ما بين 100 مليون و3 مليون ف”العشر الاواخر” بمكة، غالبيتهم تجار وبيزنسمان كيديرو الصفقات تماك.

أسفي كود8 أبريل 2023آخر تحديث : السبت 8 أبريل 2023 - 6:18 مساءً
أسفي كود
زوومصوت وصورةفي الواجهة

فجلسة رمضانية فقهوة كازاوية كان ربعيني عزيز عليه النشاط ولقصاير مع صحابو. رمضان ما رجعش منو زاهد متعبد. حتى الترواح خاطيهم. شاب كيموت على الحياة وعايشها طول وعرض. غير فرمضان كيقطع الطاسة وكيدير بحال خوتو لمغاربة “كنصوم بحال كاع لمغاربة” يحكي الشاب اللي خدا ليه بوه فلوس كثيرة ل”كود”.

هاد الشاب واخا اربعيني كيبان صغر من سنو خدام فالمهن الحرة ودخلو ما بيهش. قال لصحابو “راني قطعت غادي نمشي فالعشر الاواخر ندير عمرة”. وزاد فالجلسة اللي كانت حاضرة فيها “كود” “غادي نمشي لفايرمونت”. لوطيل طبعا.

حسب صاحب وكالة اسفار كازاوية كدير اسفار العمرة ل”كود” فهاد لوطيل واخا ماشي هو الغالي الغرفة العادية كدير فالعشر الاواخر ما بين 18 مليون و20 مليون سنتيم. صاحبنا قال باللي طلعات عليه هاد الرحلة اللي غادي يمشي ليها 32 مليون سنتيم.

شامبر مع مراتو وطيارة بيزنس كلاص ما بين 30 و40 الف درهم زيد عليها الترانسفير بكاط كاط 10 الاف درهم وطبعا تسافيرة للمدينة.
الشاب قال ل”كود” باللي ما غاديش يخسر 32 مليون سنتيم فابور “تماك غادي نتلاقى شخصيات كثيرة وكاين البيزنس” اي غادي يدير البيزنس مع راسو.

صحابو اللي طاشرونات سبقوه مع عيالاتهم. شي مشى لفايرمونت وشي مشى ل”راڤلز”. هاد لوطيل اللخر غالي كثر من فايرمونت. “فيه غير ليسويت” عشرة ايام كتبدا ب50 مليون سنتيم” يشرح صاحب وكالة الاسفار ل”كود”.

صحابو لوطيلات فمكة حرايمية. ما كياخدوش حجز فاخر رمضان الا ايلي كان فيه 10 ايام. “العشر الاواخر” بيزنس كبير. صاحب وكالة اخرى حكى ل”كود” باللي شي رئيس مدير عام لمؤسسة خاصة فالبلاد مرة مشى مع مراتو فطيارة خاصة وكرا سويت روايال فالفايرمونت خلص فيها غير لوطيل بوحدو 100 مليون سنتيم. المسؤول المغربي يضيف مصدر “كود” دوز غير 3 ايام صافي ولكن ما يمكنش يدخل لسويت الا ايلى خلص 10 ليالي كلها.

لكن شكون هادو اللي كيخلصو كثر من 30 مليون وتقدر توصل حتى ل100 مليون سنتيم علي قبال العمرة وغير 10 ايام او اقل فاخر رمضان؟ حسب تصريحات جمعاتها “كود” من صحاب وكالات اسفار كدير العمرة والحج “كاين التجار هي النسبة لكبيرة فهاد النوع. عاد صحاب العقار ورجال اعمال”. مصدر “كود” زاد فئة اخرى كتمشي وما كتخلص والو “كاين شي مسؤولين فالدولة من اجهزة مختلفة كيجي عندك. كياخد اوطيلات غاليين وبيزنس كلاص وما كيتاواش معاك وكيجي شي حد اخر كيخلص داك الشي” يشرح مصدر “كود”
المصدر اضاف ل”كود” “راه كاع اجهزة الدولة عارفاهم. كيفاش واحد كياخد نديرو حتى 50 الف درهم مع الدولة وكيقدر يخسر 30 حتى 50 مليون سنتيم ف10 ايام. هادو راه كيخرجو من المطار. كيدخلو من بعد. راه باينة مخلصين عليهم باش يقضيو مصالح هادوك مالين لفلوس”. رشوة فغسيل الذنوب. وجه اخر من وجوه هاد الفئة من لمغاربة.

بالنسبة للفئة العمرية لهاد الفئة ديال ملايرية العشر الاواخر يشرح صاحب الوكالة البيضاوي ل”كود” “غالبيتهم فوق 50 عام. كاين اللي كل عام غادي. كل عام غير فالعمرة كيخلي 50 مليون سنتيم” واضاف ل”كود” باللي كاينة فئة من هادو كيساليو العشر الاواخر كيدوزو يقصرو فدبي. هادي هي حج وحاجات. طبعا هادي الشي غير العمرة. الحج الثمن كيكون اغلى حقاش فيه مصاريف اخرى زايدة

المصدرهناء ابو علي/ عن موقع كود بتصرف

التعليقات

عذراً التعليقات مغلقة

اكتب ملاحظة صغيرة عن التعليقات المنشورة على موقعك (يمكنك إخفاء هذه الملاحظة من إعدادات التعليقات)
    الأخبار العاجلة